قبعت معي ... (1)

قبعت معي ... 

 وبعدها مقبعا....

قبّعت معي لأنّو شفت واحد عم يقطع الإشارة الحمرا....

قبّعت معي لأنّو لمّا قطع الإشارة هيدا...لحقو هيداك...

قبّعت معي لأنّو الأميركان بدّن يستعملوا دايماً حقّ الفيتو ضد الدولة الفلسطينيّة... ومزعوجين من الروس كيف بدون يستعملوا ضدن بسوريا...

قبّعت معي لأنّو لفّيت سندويشتين تإتغدّا مبارح....وانسيتن عطاولة المطبخ بالبيت...

قبّعت معي لأنّو الحكومة اللّبنانيّة بدّا تموّل المحكمة...و ما بدّا....كعيت...

قبعّت معي لأنّو بديّ أعمل كلّ الإشيا بنفس الوقت...وما معي وقت....

قبعت معي لما عرفت  إنو لما "دنيس رشي" مات، ما حداً عبرو ... ولما مات "ستيف جوبس" عملو "مسيح" الكمبيوتر 

قبعت معي لإن بشتغل مليون شغله ولما بيجي آخر الشهر بحس حالي بلا شغله ولا عمله

قبعت معي إنو كلون  بينتقدو ال"JEEP" بيصرف كتير وبيرجعو بيشترو سيارة جارة وراها طرمبة بنزين..

قبعت معي إنو في عالم بتكذب بوجك وبتضحك عليك وبس تقلها انها كذابي بتزعل...

قبعت معي إنو بوصل عل بيت من عشية تعبين صوب نص الليل، ببقى نص ساعة عام فتش ع محل تصف.

قبعت معي لما كتشفت أديش في عالم وسخة بتبزق عليا وبتقول الدني عم بتشتي.

قبعت معي لما كل يوم بكون عم بحكي عل تليفون وبيجيني خط تاني وبدق موبايلي بنفس الثانية.

(Inspired from Johnny Hage Blog (Ihtirametna