استقلال 75 - 2018 ملاحظات عامة للأيام الجاية إذا عادت إجت.

استقلال 75 - 2018 ملاحظات عامة للأيام الجاية إذا عادت إجت.

أولاً يا أهلْ الخير... هيك هيك كنتُو مجمعينْ على هل الطريق وبعض وسائِل الاعْلام كانت عم تقول إنو كان في مليون لبناني محتجزْ ب 250000 سيارة، وانو كفرتو واعصابكن تمرّنت للاستقلال... طيب سؤال بيطرحْ حالو إنو شائت الصدفْ اجتمعتوا وحَاوين من جميع المِلَلْ والكِلَلْ ليه ما عمِلتو شي؟ ولنو شي مظاهرة شي حكَّاي... ما كنتو تحت... جَمَعوكُن ورا بعض.. عمِلوا شي... انو لحِقْتو وجِيتو وخَدَمُوكُنْ فيا... ولا بسْ شاطرين بالنِكَتْ على فِيسْبُوكْ وصوَر عَ إنستَغرام ومسخَرة ڤويسية على واتسأب... هو صحِيح منظَركنْ كان متل الغنم مبارح...

ثانياً : على راسنا الجيش اللبناني والعهد القوي ونحنا حاسِين معن إنو حابين يعملو عرض استقلال قوي... بس ما فيك تِقْنَع العالم انو ماعليش تضحي بيوم وتتحمل لأن هوي متحملك 365 يوم. هيدي مقولة خاطئة بالشكل والمضمون. على الجيش ان يحمي الشعب 7/7 24/24 365/365 لأن هيدي واجباتو تاني شي لأن الشعب كفَرْ بكِل شي وباقيلو الجيش شافِيلو غاليلو... ﷲ يرِد عَنْكُن ترِكُولنا هل المَنْفَذْ هل المُنْقِذْ وإرحَمونا... وبلا تدْريبَات على إستقلال ناطِر كَفْ مِن غَيْمِة... بَدْكُنْ تَتِمَرَنو  ولَلْبِد تمَرنُو بالليل  أرْوَق بالليل... رَكْبو بروجَكتورَين... متل معم يتمرنو الصيادة بالصْلُونْجَات بِنصَاص الليالي...

ثالثاً: بيطْلَعْلَك هل الصَحافية والمذيعين ل بكونو ناطرين حَيالا شي لينْعو ويشْكُو وينِقُو وإنو يا ﷲ ليكو العهد القوي ليكو عهد ميشال عون شوفو شوفو كيف هوي فاشل... ولك ما يلعن فخَامتك بِعَذا فَخَامتو هل السَم والنَق وروح الثورة لفيكون لي بس تكونو قابضين حقَها بتلعْلِلْ وبتشتغل 24/24 يا ريت بتوظْفوها ب شي بقَدِم وما بِأَخِر بهَلْ البَلد ولك يا ريت بتكونو سوا سيا مع كل الفاسدين والمُفسِدين والقَابضِين ع نَفَسْنا ب هل البلد مش تِنَقُوُّن على الطبلية حسب مزاجْكن... هلق صحيح خيبة أمل كبيرة لهلق كل شي عم بصير... وكان بعد في هل الامل قامو شَلَحُونا يه.. ويلي جاي اكيد أسوء وما في شي بِطَمِن طالما بدنا القوي بطايفتوا بغض النظر عن قوته بالفَسَاد والسِرقة والصَفَقات رح نضَل عايشين بنفس الدُوامَة.

ثالثاً : بخصوص جماعة خط الدفاع الأول ويلي عم بقولو انو الاشخاص المعْنيين طَلَعو بيان قبل بوقت عم بِخَبرونا انو الطُرقَات مْسَكَرة بهل الإيام وﷲ بحب خَبِركن إنو بِسْمَع كل سَاعَة مُوجَز أخبار وما بقَفِي نَشْرِة أخبار ومش مخَلا تَطْبيق أخبار مش مثبتوا على تلفوني وما سمِعِت ولا شِفِت هل البيان يمكن كانو منزلينو بالجريدة الرسمية... انو لازم يكون التواصُل بِشَكل أوسَع وأسْهَل كِرْمال يوصَل لكل الناس... بعَتو رِسَالة قَصِيرة معليش  ما بِصُرلن شي "ألفا" و "تاتش"... عمِلو غروب عا واتسأب بعتو برودكاست...

ولجَماَعة العم بقولو إنو إنتو بس شِفتو قصت عرض الإستقلال وما شفتو المَجَارير ل عَامِت بشوارع بيروت وتحديداً بالرملة البيضة... انو بحياتك شو؟ كيف بتحب يجِيك الجَواب؟ انو ما هيدي القصة ع أنكا وفَكْحَة وخُرَائِية جداً. Mais qui est le responsable ? يا ترى ؟ إنو معقول؟ وإلكن عَين؟ حتى بالمَصَايب والكوارِث بدكن تِقِلْبوها طائفية وحزبية! ؟

عزيزي المواطن... ع رايت "زياد الرحباني" اذا إنتا شاعر إنو كل يوم عم يُسَجَلْ إنْتِهَاكْ بِحَقَكْ... أرجوكْ تذَكَرْ إنو هيدا إنتي ليهاَكْ.

وأخيرا بمِسْك الخِتام وعا رايت "أسامة الرحباني" بِغِنيتو لي عِمِلها من 21 سنة ويلي أعاد نشرَها على حِسابه بمناسبة هل الاحداث لي صارِت وخاصة قصة تشابه المرأة لي كانت عم بتولد بالسيارة قال: "يا صَبي ليش بدَكْ تعَانِد ب هيدا البلد يا بتِنْتِحِر يا  بِتهاجِر يا بِتفُوت باللعبة... فتِشْ عَ خَلاصَك".

وكل إستقلال وإنتو بخير

جوني خوري