قبعت معي (2)

•  قبعت معي لما شفت انو كلما يكون في امل بشي منيح بهالبلد بتولع من شي مطرح
• قبعت معي لما بيجي مجموعة اشخاص بينتقدو بااسياسة اشخاص تنيين من غير ميلة بإشيا جماعتون بتكون عملتا ومكترا طيب وين المنطق؟
• قبعت معي لما كل ما قرر ما عصب بصير شي فجأة وبعصب.... سعتا كتيير بعصب انو عصبت.... تع حلا بقى
• قبعت معي لما اكتشفت انو في وزة بدينتي...  ورحت عند الحكيم وما خلا فحص ما عملو واخر شي ببرادة بيطلع فيي وبثقة بقول بدك تتعايش معا... إنو واذا عيشين ببلد التعايش ضروري عيش معا ؟
• قبعت معي لأن مرقت ع ترنبط بنزين حديثة جداً  عندا سيستام غسيل سيارات ... يعني الله أكبر... صف السيارات الناطرة لتغسل أكتر من صف الفرن بعز دين الحرب. وهيدي الترنبة عندا سيستام تاني "الخدمة الذاتية" بتنزل انت بتعبي سيارتك بنزين وبتوفرلك 1000 ليرة بالتنكة واكتشفت انو لما عبيت وفليت وكذدرة وخلصت انو ناسي الغطا بالترونبة... يعني حتى شغيل ع ترونبة ما بيمشي حالي .... يا عين !!
• حبيت بنت وانغرمت فيا ووعدتا انو قريباً جداً رح تتغير حياتنا ونعيش ربيع عمرنا... طلع ربيع من جماعة الأخوان
• قبعت معي عل المزبوط لما قررت نزل وزني .... خلص ما بقى بدا ... بس ما نتبهت انو من بعد كل نزلي في طلعة... اى طلعت بوزني
•  قبعت معي لأنو اكتشفت انو في كمية كذب بين الرجال عامة وخاصة رجال الأعمال مستعدة تغطي ع كل شي في كمية ملح استخرجو وممكن يستخرجوا من محيطات هل الكرة الأرضية.... طيب فرضاً خلصو... منين بدن نأمنلن ملح لهلرجال ؟
• قبعت معي لما اكتشفت انو بهالبلد ما في شي ماشي ... بس بذات الوقت كل شي ماشي... شو هيدا؟؟؟؟؟؟ مين ماشي ؟
• قبعت معي لأن صرلي زمان مش كاتب... ولما قررت اكتب طالع معي شي كتيير فاشل ، فعذرأً وبوعدكن انو ما بقى تقبع معي.